नेपाली काँग्रेसको १५औँ महाधिवेशनको उद्घाटन समारोहमा नेकपा (एमाले)का अध्यक्ष केपी शर्मा ओली सहभागी नहुने भएका छन्।
एमालेका तर्फबाट महासचिव शंकर पोखरेलले सहभागिता जनाउँदै शुभकामना दिने कार्यक्रम तय भएको छ। ओली सहभागी नहुने र पोखरेलले एमालेको प्रतिनिधित्व गर्ने विषय एमाले प्रचार विभाग प्रमुख नीरज आचार्यले पनि पुष्टि गरेका छन्।
काँग्रेसको १५औँ महाधिवेशनको उद्घाटन आइतबार दिउँसो २ बजे काठमाडौँको खुलामञ्चमा हुँदै छ। काँग्रेसले पनि आधिकारिक सूचनामार्फत असोज १८ गते दिउँसो २ बजे उद्घाटन समारोह हुने जनाएको छ। नेपाली काँग्रेस उद्घाटन समारोहमा विभिन्न राजनीतिक दलका शीर्ष नेता तथा प्रतिनिधिले सम्बोधन गर्ने कार्यक्रम छ। काँग्रेस प्रवक्ता देवराज चालिसेका अनुसार राष्ट्रिय स्वतन्त्र पार्टीका सभापति रवि लामिछानेसहित विभिन्न दलका नेताले समारोहमा सम्बोधन गर्नेछन्।
नेपाल कम्युनिस्ट पार्टीका संयोजक पुष्पकमल दाहाल ‘प्रचण्ड’ पनि उद्घाटन समारोहमा सहभागी हुने कार्यक्रम रहेको उनको सचिवालयले जनाएको छ।
त्यस्तै राष्ट्रिय प्रजातन्त्र पार्टीका अध्यक्ष राजेन्द्र लिङ्देन, जनता समाजवादी पार्टीका अध्यक्ष उपेन्द्र यादव, जनमत पार्टीका अध्यक्ष चन्द्रकान्त राउत तथा श्रम संस्कृति पार्टीका महासचिव आरेन राई सहभागी हुने तय भएको काँग्रेसले जनाएको छ।
राष्ट्रिय जनमोर्चाका तर्फबाट कार्यवाहक महासचिव घनश्याम पौडेल उद्घाटन समारोहमा सहभागी हुने निश्चित भएको प्रवक्ता चालिसेले बताएका छन्।
काँग्रेसले यसअघि प्रमुख राजनीतिक दलका शीर्ष नेताहरूलाई महाधिवेशनको उद्घाटन समारोहमा सहभागिताका लागि औपचारिक निमन्त्रणा गरेको थियो। ओली, ‘प्रचण्ड’ र लामिछानेलाई काँग्रेसको टोलीले उनीहरूको निवासमै पुगेर निमन्त्रणा दिएको थियो।
